شخبطة على الورق

أماني محمد - عارفين يعنى ايه شخبطة .. يعنى رسومات كدة وخطوط  ملخبطة .. ومحدش بيفهمها غير اللى رسمها .. فيه اللى بيرسم قلب عشان بيدور على الحب .. وفيه اللى بيرسم اسمه عشان بيحاول يحب نفسه .. وفى اللى بيشخبط بجد برسومات كروكى وخطوط فوق بعض .. متفتكرش انه بيلعب .. بس خليك متأكد ان جواه  ملعب .. بتلعب فيه افكار كتير محيراه ومغلباه وهو مش عارف يطلعها من جواه .. وفيه اللى من شخبطته عرف يوصل لحقيقته .. فحول شخبطته لكلمة .. كتب عن نفسه .. عن حياته ودنيته .. عن طريقه وسكته .. وعن حلمه وامنيته .. عن هدفه وفكرته .. وعن دينه وملته .. فيه اللى اتكلم عن حبه .. وفيه اللى اتكلم عن غلبه  .. فيه اللى اتكلم عن وطنه .. وفيه اللى اتكلم عن غربته .. وفيه بقى اللى حولها لرسمة .. فرسم ضحكته .. وفيه اللى نزل على الورقة دمعته ..  

أل ويقولك دى شخبطة .. ومالها الشخبطة .. وهو يعنى احنا حياتنا متظبطة ! سكك وطرق كتير . .اوقات بنمشى فيها من غير تفكير .. ونسيبها لربنا واللى يصير يصير .. ده توكل على فكرة مش تواكل .. عشان احنا عملنا اللى علينا كتير .. وهنعمل ايه يقى لازم نساير التغير .. ما هو العالم كل يوم برأى .. وكل يوم بفكر .. بس هنقول ايه .. ربك كبير ..  

اجمل اللوحات كانت فى اولها شخبطة .. واجمل القصايد كانت فى البداية كلماتها ملخبطة .. بس كل حاجة بالارادة بتكمل .. واحنا كمان لازم نكمل .. لازم نلاقى نفسنا .. ونعبر عن روحنا ونحقق حلمنا .. لازم نخرج الشخبطة اللى جوانا .. كل واحد بطريقته .. ويحدد هو هدفه ورسالته .. متسبش الشخبطة تفضل جواك . .لانها هتفضل معاها سجناك .. خرجها وبعترها على الورق .. حولها لفكرة .. واعمل بيها حاجة لبكرة  ..اكتب  .. اشعر .. ارسم .. صمم .. المهم متسبهاش اسراك .. فى حاجات وناس كتير حواليك محتجالك .. محتاجة لطموحك وامالك .. وعلمك وخيالك .. فمتبخلش عليهم بيه .. لان جه وقت دورك .. وكل واحد دوره مستنيه .. 

وانا دلوقت وبعد ما خلصت .. همسك ورقة واشخبط وارسم طير .. فاتح جناحاته وقرر يطير .. يطير بعيد فى الفضا .. وويفتح قلبه لشوية فضفضة .. وينسى بقى شوية الحيرة والقلق .. ولو سألتونى هترسمى ليه وانتى بتكتبى .. هقولكم مش هتفرق كتير .. ما هى كلها شخبطة على الورق ..  

تابعنا على الفيسبوك:

تابعنا على تويتر: