أماني محمد - البنت في مجتمعنا لمابتكون طموحة .. بتطير ورا أحلامها بجناحات مجروحة .. و كل ما تنجح و توصل لحلم .. إللي حواليها يشيٍلوها الهم .. أصلك في الآخر بنت و مصيرك لبيتك زوجة وأم.
على فكرة ده برده حلم من أحلامها .. لكن برده هي شايفة حاجات تانية فالمستقبل قدامها .. بس للأسف كتر الكلام بيبرجلها و يلخبطها .. و يشقلب كمان كل خططها.
و أول ما تخلًص كليتها .. تستلمها صاحبتها .. بلا كورسات بلا شغل، ده كله بهدلة و كلام فاضي .. سيبك منه و تعالي أجوزك أخويا .. هيستتك و يأكلك لقمة القاضي. ياعالم أنتو سيبوها فحالها و ربنا يهديكو .. وبصوا بقى شوية على العالم من حواليكو .. الدنيا كل يوم بتتغير .. وأنتو برده لسة إللي فيكو فيكو.
تبعد عنهم و تكمل هي في طريقها .. و تستسلم كمان في يأس لوحدتها .. و تزيد كل يوم جواها غربتها .. محدش جنبها ينصحها و يشجعها .. و خوفها و قلقها من المستقبل يزيد من وجعها .. فتحتار و تتخبط فمشاعرها .. و تدور من جواها على حد يحتويها و يفهمها .. فتختار غلط في لحظة ضعف و من غير تفكير .. ماهي كمان تعبت من كلام الناس الكتير.
تنخدع و تفتكر إن بشوية حب و تعب هيبنوا حياتهم سوا .. و تبقى أحلامها واقع على الأرض و مش طايرة خلاص فالهوا .. تفتكر أنه هيكون ليها دعم و سند .. بس للأسف يتحول و يبقى كل همه هو خلفة الولد .. و مع المسؤلية كمان يتخلى عنها .. و لو اتكلمت أو اشتكت يجرحها و يهينها .. محدش بيقف جنبها و يحفظلها حقها .. مش هو ده إللي إنتي رفضتي عشانه كتير و اختارتيه .. خلاص بقى حاولي تعيشي معاه و تستحمليه .. طب و هو اختيارها ده مين جبرها عليه وخلاًها تستسلم ليه ؟ مابتسألوش نفسكوا ده سببه من الأساس كان إيه ؟!
هي أحلامها بسيطة و العالم مش عاوزة توصل لمنتهاه .. هي بس بتحاول تفيد نفسها وتبعد عن حياتها الروتين والملل إللي فحياة غيرها شايفاه .. و فالآخر يقولوا أصل طموحها مكنش ليه سقف وهو إللي كسرها .. مع إن كل مشكلتها عادات و تقاليد مجتمع معرفش يقدًرها.
مينفعش يا نص المجتمع تخافي تاني أو تضعفي .. ده في كنوز كتير فإيدك و لازم تعرفي .. إن مهما كانت دنيتك صغيرة و مجتمعك مش معترف بيكي .. أنتي بحماسك واصرارك تقدري تخليه يغير نظرته ليكي .. مش لازم تكوني سفيرة أو وزيرة .. كفاية يكون الناس لفكرة بسيطة منك اثيرة .. فكري، أكتبي، أرسمي، صممي وسقف طموحك على قد أمكانياتك عليه ووطيه .. وزي ما المجتمع فرض فيوم أفكاره العقيمة عليكي .. جه الوقت دلوقتي أنك تفرضي أنتي ابداعك عليه .
تابعنا على الفيسبوك:
تابعنا على تويتر: